وأخيراً إتصل بى الرئيس

رن جرس التليفون وكان على ما يبدوا أنه ترانك ، ألو سلاموا عليكوا..وكان الرد عليكم السلام إزيك يا مواطن ياأصيل ،أخبارك إيه وعامل إيه مش كله تمام يارب تكون مبسوط وسعيد ومتهنى فى البلد ، فعدت أسئل مين حضرتك ؟ قال إنت لسه ما عرفتنيش ياراجل ،قلت له لا والله ، حضرتك تعرفنى قبل كده وأنا أعرفك ،قال لى ازاى دا انت من مواطنى دولتى دولة ( ديمقراطيا )،ثم عاد فقا ل انا يامواطن رئيس الجمهورية ، فلم اتمالك نفسى من شدة الفرح أن الرئيس يتصل بيا ،فهتفت بأعلى صوتى بتتكلم جد والنبى انت الريس مش مصدق ،طب ليه بتتصل بيا انا ،فعاد الرئيس وقال كل يوم باتصل بسعيد الحظ من مواطنى دولتى باطمن على احوالهم واسئلهم عن ظروفهم وباعرف منهم ايه إيلى مزعلهم وإيه إيلى مفرحهم ، مخنوق من ايه ، ومبسوط من ايه ، فرددت عليه وقاطعته والله ياريس كفاية حضرتك انك اتصلت ، دى ما بتحصلش ولا فى الدول الاوربية ،انا مبسوط كده ،فحلف الرئيس 100 يمين على يمينى لازم تقولى اخبارك ونقصك حاجه ،قول ما تنكسفش فقلت له طالما مُصر ياريس ،انا مشكلتى اول ما باصحى من النوم هو رغيف العيش كل يوم أنزل اشترى عيش من الفرن بهدله وضرب وكمان نشل من الناس ايلى واقفة مخصوص تسرقنا فى عز الضهر ،وأنا عاوز لو سمحت حضرتك تشوف حل للمشكلة دى بتاعت كل يوم ،فرد الريس يعنى طلبك ايه قلت له حضرتك ابو العارفين بقى ، فاذا به يتصل بتليفون اخر وانا معه ع الخط ودارالحوار التالى ....الو... يا وزير التموين فرد عليه الدكتور محمد المخبزى ،نعم يا ريس ، بتعمل ايه عندك قال له قاعد فى الشارع زى ما حضرتك قلت لى واقف بظبط الطوابير يا فندم ، فرد الرئيس خلاص من النهاردة مفيش طوابير عيش ،من بكره ابعتوا العيش للناس فى البيوت علشان بيحصل ضرب وسرقة للمواطنين فى عز الضهر ، فرد علية المخبزى وزير التموين نص ساعة يكون القرار جاهز ويتعمم ، فعاد الرئيس وقال لى مبسوط فلم اتمالك نفسى من الفرح ثم قبلت السماعة وكأنى ارغب فى تقبيل الريس ، فعاد سيادة الرئيس وقال ها....فى حاجة تانية قلت له والله انا مكسوف من حضرتك بس انت ايلى قلتلى قول ايلى مزعلك ، قال طبعاً اتفضل فقلت يزيد فضلك ياامير ، والله بس المواصلات يا ريس وما ادراك ما المواصلات بالذات الصبح واحنا رايحين الشغل بتبقى بهدلة وعراك وشتيمه،و انت عارف البنزين غلا مش بنقدر نركب تاكسى ،والحكاية جيم زى ما سيادتك عارف ، فاذا به يتصل من خط ثانى ..فإذا به يتصل بوزير النقل والمواصلات ويقول يا سيد مصطفى مرسيدس ، فرد علية الوزير تحت امرك ياريس ،قاله من النهاردة تصرف لكل موظف (توك توك) يروح ويرجع بيه من الشغل ، قاله والمواصلات ياريس قاله خليها للعمال الغلابه ،فرد عليه الوزير حاضر ، ثم قال الريس إسمع اعمل كارنيهات لمدة سنة( يفولوا) بيها من البنزينة ببلاش !!! خلاص الكلام ده يتنفذ كمان ساعة علشان الموظفين يروحوا الشغل بدرى ،وكدت ان ارقص لولا الخجل من ان يسمع الريس قفذاتى فى الهواء ،فعاد وقال لى فيه حاجه تانية مزعلاك او مضيئاك ،فقلت له ياباشا عندنا عيل فى الاسكندرية واد صحفى إنما جن كان بيغطى شغله فى مدرسة الجزيرة اكيد سيادتك علمت بيها .فإذا بصوت الريس يتغير ويتشنج واذ ا به يقول أاااااااه انت قلبت على المواجع مش ده بتاع موضوع حماده عبد اللطيف الواد ده خلانى اعيط لما لقيت الموضوع بتاعه على الفيس بوك اصلى انا عامل جروب انا كمان تضامن مع حماده عبد اللطيف من اجل الانسانية وانت عارف انى سفرته على حسابى لالمانيا وعطيته لما رحت اسلم عليه (بوكت مانى ) ومصحف صغير علشان يحميه ،فعاد وقالى كمل معلش انت قلبت على المواجع ،فقلت ياريس الواد الصحفى ده اسمه حسام الوكيل واد مجدع وعتره وممسوك من شهر ..ابوه وامه قاعدين يعيطوا علية ليل نهار لانه كان كل يوم ينزل يجبلهم العيش والفول والفلاافل ،بعد ازنك الواد ده عاوزين نخرجه من السجن ، وما ان سمع كلمة سجن حتى جن جنونه بتقول سجن هوا انا لسه فى دولتى حد مسجون قلتله ايوه ، فسمعته يقول اتصلولى بوزير الداخلية اللواء تقى الدين الميزان ،فرد عليه الوزير نعم ياريس ، فقال الريس ازاى يا تقى لسه عندنا سجون مش قلتلك مفيش حد يدخل السجن طول ما انا عايش والسجون تزرع بدل منها فول وجرجير للشعب ، قاله ياريس بس ، فقاطعه الريس ما فيش بس ،السجون تتقفل والواد حسام يطلع علشان ابوه وامه مستنينوه يجبلهم فول وعيش ، ولو مش عاجبك قدم استقالتك ،فاهم ولا لأ.. !! فرجع الريس بعد المكالمة الساخنة والدش البارد لوزير الداخلية،وقالى فيه حاجه تانية قلت له والله حاجه تكسف بس حضرتك قلتلى أتكلم ، طبعاً حضرتك متابع كوره وشايف الزمالك مش عارف يغلب الاهلى خالص ومش عارف ياخد ولا بطوله عدله غير بطولة الكأس المعفنه دى، فرد الريس ودى اعمل فيها ايه ،فرددت عليه حضرتك ابو المفهوميه بقى !! فقال الريس فهمت فهمت !!! واذا به يطلب وزير الشباب والرياضة الدكتور ميدو سوسته ويخبر ه ان الماتش ايلى جى بين الاهلى والزمالك يجيب حكام من الهند !‍! وكمان الماتش ده الاهلى مايلعبش ابوتريكة ولا بركات ولا فلافيو ولا جلبرتو ولا شادى ولا حسام عاشور ويشتروا محمد عبد المنصف يلعبوه الماتش اساسى ،فاهم ولا لأ .
قاله حاضر دلوقت حنبلغ رئيس اتحاد الكورة بالمطلوب يا ريس ،فطرت من السعادة اخيراً الزمالك حيكسب الاهلى بشرف !!!
فعدت للريس وقلت له العمارات فى مصر بتنهار كل يوم ولامواخذه الناس بتموت لا ليها ذنب ولا يحزنون ، قال الريس هولسه العمارات بتقع مش خلاص المواضيع دى انتهت من زمان ، قلت له لاو الله لسه فيه عمارتين واقعين فى الاسكندرية من شهر ونص ، فطلب من المستشار الاتصال بوزير الاسكان والتعمير على دبشه ابو حجر ،فقله ايه يا دبشه الكلام ده صحيح العمارات لسه بتقع مش قلتلك ان كل عمارة تحطلها سوست ،زى اليابان خلينا ناس متحضرين زيهم ،فرد الوزير حاضر يا ريس بكرة كل العمارات حتكون على سوست وحخلى الشعب يرقص يا فندم ،
فعاد سيادة الريس يكلمنى تانى وأنا محرج كل دى مكالمة ، وكأن الريس حس بما داخلى قالى متخفش يا مواطن اصل شركة الاتصالات عامله عرض جنان اشترى خطين واحد ارضى وواحد تجارى واتكلم ببلاش لمدة سنه !!واتكلم ارضى يابن بلدى!!؟
فعاد الريس يسئلنى اخبار الاكل واللحمة ايه معاكوا قلتله والله يا فندم الناس مش لاقيه اللحمة والظاهر ان الدوله لسه مانزلتش اللحمة فى الجمعيات ، فرد الريس جمعيات مين انا قايل لوزير الزراعة الدكتور سيد كندوز انه يبعت للناس 2 كيلو لحمة وفرختين وللمتجوزين جوزين بط وجوزين حمام و2 كوارع للمسائل !!
فعدت والله ولا حاجة من دى وصلت ياريس فاذا به يتصل بالوزير سيد كندوز ،إيه يا كندوز الحاجة ما وصلتش للناس ليه ويبدوا انه كان يأكل فرد على الرئيس متأخراً وقاله الريس كفايه حشر بقى انت لسه بتاكل من امبارح بطل اكل وابعت للناس الحاجة يا طفس، فرد علية الوزير كله حيبقى عند الناس فى الغدا يا ريس !!
فعاد الريس وقال لى باقى لك 3 دقايق معايا علشان اشوف مواطن تانى اكلمه ، فقلت انت عارف ياريس ان مشكلة العنوسه فى البنات والشباب زادت والموضوع ممكن يجيب مصايب انت هرشها!!
قالى فاهم فاهم ،فاتصل بشيخ مشايخ الدوله الدكتور( ابو الريش ان شاء الله تعيش )
وقال يا مولانا من بكرة كل واحد يتجوز أربعة فاهم فرد عليه الشيخ بصوت خافت تحت امرك ياسيدى الرئيس ، فقلت للريس يعنى انا اروح اتجوز اى واحدة دلوقت ،فرد الريس ايوه ، والشبكة والعفش والكوافير على حسابى كمان!!! فطرت من الفرح يعنى انزل دلوقت ، قال روح انت مستنى ايه فهممت ان انزل من باب الشقة واذا بضربه قويه مثل الدبشه وكأنها (زغده حصان )على صدرى وكتفى الأيمن واذا بى انظر فأجد أمامى زوجتى المصونة تقول لى بصوت رخيم مثل تجار السموم اصحى من النوم وكفايه كده نوم !!! قوم علشان تروح الشغل !! وإسمع أبقى بعد كدة ماتنساش تقفل البلكونة وابقى تستغطى كويس ، فدققت النظر فقالت بتبحلق فى مين قوم يا أبو العيال علشان تنزل تجيب الفول والعيش ، فقلت فى نفسى هو كل ده كان حلم وأنا مش سعيد الحظ إيلى الريس اتصل بيه الصبح ،واذا بها تنادى مرة اخرى انتا لسه نايم انزل علشان تلحق طابور العيش ،والفلافل السخنه !! فقلت وفى نفسى حرقه .. حاضر ،حاضر هو الواحد ميعرفش يحلم حلم كامل ابداً ولا مرة
خرجت وقلت أااااااااه نسيت أسئل الريس هى نمرته كام ،علشان أبقى أتصل بيه زى ما هو اتصل بيا.
هذه القصة من سلسلة قصص قصير بعنوان (حلم سعيد الحظ ) تكتمل ان شاء الله بعد عيد الاضحى المبارك 0